মংগলবাৰে ৰাজ্যজুৰি উদযাপন কৰা হয় মহাপুৰুষ মাধৱদেৱৰ ৪৩০ তম তিৰোভাৱ তিথি ৷ সমান্তৰালকৈ বটদ্ৰৱা থানতো উদযাপন কৰা হয় মাধৱদেৱ গুৰুজনাৰ তিৰোভাৱ তিথি ।
অসমীয়া জাতিৰ মহানায়ক শ্রীমন্ত শংকৰদেৱৰ প্রধান শিষ্য বঢ়াৰ-পো মাধৱদেৱৰ তিৰোভাৱ তিথি দিনযোৰা কাৰ্যসূচীৰে বটদ্রৱা থানত পালন কৰা হয়। কাৰ্যসূচী অনুসৰি থানত পুৱাৰ তাল কোবোৱা প্ৰসঙ্গৰে আৰম্ভ হয় অনুষ্ঠান।
লগতে তিথি উপলক্ষে আশোৱাৰী ৰাগৰ গীতো পৰিবেশন কৰা হয়।
ভকত-বৈষ্ণৱ, যুৱক-যুৱতী, আই মাতৃৰ উষা কীৰ্তনেৰে মুখৰিত হৈ উঠে বটদ্রৱাৰ চৌদিশ। খোল প্ৰসঙ্গ , প্রসংগীয়া নাম, শেহপাল, ঘোষা-কীৰ্তনৰ লগতে ভাদমাহৰ পৰম্পৰাগত ওঠৰ প্ৰসঙ্গৰে পৰিবেশিত হয়। বিয়লি বটদ্রৱা থানৰ পৰম্পৰা অনুসৰি ‘দধিমথন’ ভাওনাও পৰিবেশন কৰা হয়।
