বানৰ বাবে চৰাইদেউ-শিৱসাগৰত Census 2027ৰ সময়সীমা বৃদ্ধি l ৩১ অক্টোবৰলৈ বৃদ্ধি গৃহ তালিকাভুক্তিৰ সময়সীমা l বান পৰিস্থিতিৰ বাবে অসমৰ চৰাইদেউ আৰু শিৱসাগৰ জিলাত Census 2027ৰ গৃহ তালিকাভুক্তি আৰু গৃহ গণনাৰ সময়সীমা বৃদ্ধি কৰা হৈছে। ভাৰতৰ মহাপঞ্জীয়ক তথা Census Commissioner-এ জাৰি কৰা অধিসূচনা অনুসৰি, এই দুয়োখন জিলাত গৃহ তালিকাভুক্তিৰ কাম ৩১ অক্টোবৰ ২০২৬লৈ চলিব। পূৰ্বে এই পৰ্যায়টো ৩০ ছেপ্টেম্বৰৰ ভিতৰত সম্পূৰ্ণ কৰাৰ কথা আছিল।
অসমৰ আন জিলাসমূহত গৃহ তালিকাভুক্তিৰ কাম ১৭ আগষ্টৰ পৰা ১৫ ছেপ্টেম্বৰলৈ সম্পন্ন কৰা হৈছিল। কিন্তু বানৰ ফলত চৰাইদেউ আৰু শিৱসাগৰত Census-ৰ প্ৰশিক্ষণ আৰু অন্যান্য প্ৰস্তুতিমূলক কামো আগষ্ট মাহত স্থগিত ৰাখিবলগীয়া হৈছিল। Census 2027 দুটা পৰ্যায়ত অনুষ্ঠিত হ’ব। প্ৰথম পৰ্যায়ত গৃহ তালিকাভুক্তি আৰু গৃহ গণনা কৰা হৈছে, আনহাতে দ্বিতীয় পৰ্যায়ত জনসংখ্যা গণনা ২০২৭ চনৰ ফেব্ৰুৱাৰী মাহত অনুষ্ঠিত হোৱাৰ কথা।
গৃহ তালিকাভুক্তি পৰ্যায়ত দেশৰ বিভিন্ন স্থানৰ ঘৰ, গৃহস্থলী আৰু অন্যান্য গাঁথনিৰ তথ্য সংগ্ৰহ কৰি পৰৱৰ্তী জনসংখ্যা গণনাৰ বাবে প্ৰয়োজনীয় তথ্যভিত্তি প্ৰস্তুত কৰা হয়।
চৰাইদেউ আৰু শিৱসাগৰত বান পৰিস্থিতিৰ বাবে হোৱা বিলম্বৰ প্ৰতি লক্ষ্য ৰাখি সময়সীমা বৃদ্ধি কৰাৰ সিদ্ধান্ত লোৱা হৈছে, যাতে জিলাদুখনত Census-ৰ এই গুৰুত্বপূৰ্ণ কাম সঠিকভাৱে সম্পূৰ্ণ কৰিব পৰা যায়।
