হায়দৰাবাদত খাদ্য ভেজালবিৰোধী অভিযান। মালকাজগিৰি স্পেচিয়েল অপাৰেচনছ টীমে মালকাজগিৰি ফুড এডাল্টাৰেচন ছাৰ্ভেইলেঞ্চ টীম (MFAST)ৰ সহযোগত দুটা খাদ্য প্ৰস্তুতকাৰী প্ৰতিষ্ঠানত অভিযান চলায়।
বুধবাৰে আলৱালৰ Natraj Milk & Milk Food Products আৰু বোৱাৰামপেটৰ Yashoda Sweet & Namkeenত অভিযান চলাই প্ৰায় ৫০০ কেজি পনীৰ, স্কিমড মিল্ক পাউডাৰ, ৰন্ধন তেল, ডালডা আৰু প্ৰস্তুত কৰা হালোৱা জব্দ কৰা হয়।
আলৱালৰ Natraj Milk & Milk Food Productsত অভিযান চলাই স্কিমড মিল্ক পাউডাৰ ব্যৱহাৰ কৰি পনীৰ প্ৰস্তুত কৰাৰ অভিযোগ উত্থাপন হয়। অভিযানকাৰী দলে প্ৰায় ৫০০ কেজি খোলা পনীৰ আৰু ৫০ কেজি স্কিমড মিল্ক পাউডাৰ জব্দ কৰে। প্ৰতিষ্ঠানটোৰ মালিকক জব্দ সামগ্ৰীৰ সৈতে আৰক্ষীৰ হাতত গতাই দিয়া হয়।
আনহাতে, Yashoda Sweet & Namkeenত ভেজিটেবল ফেট, তেল আৰু বৃহৎ পৰিমাণৰ স্কিমড মিল্ক পাউডাৰ ব্যৱহাৰ কৰি হালোৱা প্ৰস্তুত কৰাৰ অভিযোগ উত্থাপন হৈছে। অভিযানত বিভিন্ন ব্ৰেণ্ডৰ ৮০টাতকৈ অধিক বেগ স্কিমড মিল্ক পাউডাৰ, Freedom তেলৰ ১০০টা টিন, Daldaৰ ৫০টা টিন আৰু প্ৰায় ২১ কেজি পেকেটজাত হালোৱা জব্দ কৰা হয়।
খাদ্য সুৰক্ষা বিষয়াসকলে জনোৱা মতে, খাদ্য যোগান শৃংখল সুৰক্ষিত কৰা আৰু জনস্বাস্থ্য ৰক্ষাৰ উদ্দেশ্যেই এই অভিযান চলোৱা হৈছে। জব্দ কৰা খাদ্য সামগ্ৰীৰ নমুনা পৰীক্ষাৰ ফলাফল আৰু তদন্তৰ ভিত্তিত পৰৱৰ্তী আইনী ব্যৱস্থা গ্ৰহণ কৰা হ’ব।
ইফালে, হায়দৰাবাদ আৰু ইয়াৰ কাষৰীয়া জিলাসমূহত চলি থকা TG SAFE অভিযানৰ অধীনত ইতিমধ্যে ২০টা প্ৰতিষ্ঠান পৰিদৰ্শন কৰি ১৮টা খাদ্যৰ নমুনা সংগ্ৰহ কৰা হৈছে। ইয়াৰে ১০টা প্ৰতিষ্ঠানক উন্নয়নৰ জাননী আৰু আন তিনিটাৰ বিৰুদ্ধে কাৰণ দৰ্শোৱাৰ জাননী জাৰি কৰাৰ প্ৰস্তাৱ দিয়া হৈছে।
